ၾႆးမႆႈဝဵင်းၼမ်ႉသၼ်ႇ ပႃးၵႂႃႇလင်ႁိူၼ်းၵူၼ်း 50 ၵွပ်ႈၾၢႆႇၶႄၾႆးဢမ်ႇမီးလွင်ႈႁၢင်ႈႁႅၼ်းတူဝ်ႈတၼ်း။ တၢင်းလႃႈသဵဝ်ႈ ၵဵပ်းငိုၼ်းၵၼ်ၸွႆႈထႅမ်ၵူၼ်းထူပ်းၽေး။

ဝဵင်းၼမ်ႉသၼ်ႇ ၼႃႈလိၼ်ၽွင်းငမ်းတူဝ်ၵဝ်ႇၸၢဝ်းၶိူဝ်းတဢၢင်း (ပလွင်ႈ) ၸိုင်ႈတႆးပွတ်းႁွင်ႇ

မိူဝ်ႈဝၼ်းထိ 02/11/12 ၵၢင်ၼႂ်ယၢမ်း 10:00 မူင်း၊ ၾႆးမႆႈဝဵင်းၼမ်ႉသၼ်ႇ ပွၵ်ႉၵၢင်ဝဵင်းလႄႈပွၵ်ႉၼမ်ႉမွၼ်းလင်ႁိူၼ်း ၵူၼ်း 50 လင်။ ၵူၼ်းထူပ်းၽေးၾႆး မီးမွၵ်ႈ 300 ၵေႃႉ ၵႂႃႇလိုဝ်ႈသဝ်းဝႆႉတီႈဝတ်ႉမုၼ်ၸဝ်ႈ တေႃႇထိုင်ယၢမ်းလဵဝ် (2 ဝၼ်းပူၼ်ႉမႃး) ယင်းပႆႇလႆႈႁဵတ်းတီႈယူႇတီႈသဝ်းသင်၊ ၸဝ်ႈၼႃႈတီႈၾၢႆႇၵဵဝ်ႇၶွင်ႈၶဝ် ယင်းတိုၵ်ႉၸတ်းတီႈယူႇတီႈသဝ်း ပၼ်ယူႇ- ၼႆယဝ်ႉ။

ၵဵဝ်ႇၵပ်းလွင်ႈၼႆႉ သြႃႇၸၢႆးဢွင်ႇထုၼ်း ၵေႃႉၵႂႃႇၸွႆႈၵူၼ်းထူပ်းၽေးလၢတ်ႈဝႃႈ- ဝဵင်းၼမ်ႉသၼ်ႇၼႆႉ လူတ်ႉၶႄၾႆး မီးယူႇ 2 လမ်း၊ လူတ်ႉတၢင်ႇၼမ်ႉမီး 1 လမ်း လႄႈ လႄႈ လူတ်ႉၼမ်ႉႁူတ်းၾႆးၶွင် ၶွမ်ႊပၼီႊ 1 လမ်း၊ တင်းမူတ်းမီးလူတ်ႉ 4 လမ်း ၵူၺ်း၊ ၵွပ်ႈၼၼ် ၽေးၾႆးဢမ်ႇၵိုင်ႇမႆႈၵႂႃႇၼမ် မွၵ်ႈၼၼ်ႉၵေႃႈလႆႈမႆႈၵႂႃႇ။ ဢၼ်ၾႆးမႆႈၵႂႃႇတင်းမူတ်း လင်ႁိူၼ်းၵူၼ်း 50 လင်၊ ပေႃးသွၼ်ႇၵႃႈၶၼ် ငိုၼ်းတွင်းမိူင်းမၢၼ်ႈယၢမ်းလဵဝ် တူၵ်းမွၵ်ႈ 200,000,000 လၢၼ်ႉ – ဝႃႈၼႆ။

ၵူၼ်းမိူင်းပွတ်းၼမ်ႉသၼ်ႇၼႆႉ ၼႂ်းဝဵင်းၺႃးၽေးၾႆး၊ ပွတ်းဝၢၼ်ႈၼွၵ်ႈၼႃးပၢင်ႇသမ်ႉၺႃးၽေးသိုၵ်း။ ဢၼ်သိုၵ်းမၢၼ်ႈ ၸိၼႄးၵူၼ်းဝၢၼ်ႈဝႃႈတိတ်းတေႃႇၵပ်းသိုပ်ႇ တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း (TNLA) ၼႆသေ တိၺွပ်းပေႃးထုပ်ႉ ၸိူဝ်းၼႆႉၵေႃႈ တိုၵ်ႉမီးယူႇၶိူဝ်းယႂ်း၊ ၼႂ်းၸႄႈဝဵင်းၼမ်ႉသၼ်ႇ တွၼ်ႈတၢင်းႁွင်ႇလႄႈ ၼႂ်းၸႄႈဝဵင်းမၢၼ်ႈတူင်ႈၸိူဝ်းၼႆႉ ယင်းတိုၵ်းပဵၼ်ပၢင်တိုၵ်းၵၼ်ယူႇ- ၼႆယဝ်ႉ။

ၾၢႆႇၼိုင်ႈ ပိူဝ်ႈတႃႇၵမ်ႉထႅမ်ၸွႆႈလိူဝ်ၵူၼ်းထူပ်းၽေးၾႆးတီႈဝဵင်းၼမ်ႉသၼ်ႇၼႆသေ တၢင်းဝဵင်းလႃႈသဵဝ်ႈၵေႃႈ ၽူႈၵွၼ်းပွၵ်ႉ ယွမ်ႇ/ဝၢၼ်ႈဢိူင်ႇၶဝ် ၵဵပ်းငိုၼ်းၼႂ်းပွၵ်ႉယွမ်ႇ/ဝၢၼ်ႈဢိူင်ႇ ၼိုင်ႈႁိူၼ်း 1,000 ပျႃး။ ၼႂ်းဝဵင်း လႃႈသဵဝ်ႈ တင်းမူတ်းမီး 12 ပွၵ်ႉ၊ ယူႇတီႈလုၵ်ႈၸုမ်းပႃႇတီႇသိူဝ်ၽိူၵ်ႇ (SNDP) လၢတ်ႈဝႃႈ လင်ႁိူၼ်း ၼႂ်းဝဵင်းပႃးၸဵမ်သၢပ်ႇဝဵင်း မီးဢမ်ႇယွမ်းမွၵ်ႈ 50,000 – ၼႆယဝ်ႉ။