ၵၢၼ်ၸႂ်ႉ ဢၢမ်းၼၢတ်ႈ (ဢႃႇၼႃႇ) သေ လွၵ်ႇငိုတ်ႈ ၼိူဝ်ၵူၼ်းမိူင်းၶဝ်ၼႆႉ ဢမ်ႇၸႂ်ႈ ၵေႃႉသိုၵ်းငၢၼ် ႁၢပ်ႇထၢမ်းၵၢၼ် ဢဝ်ပုၼ်ႈၽွၼ်း တူၺ်းထိုင် ဝၢၼ်ႈမိူင်း၊ ၵူၼ်းမိူင်း ပဵၼ်သိုၵ်းငရၢႆးလူင် ၸွမ်းလွၵ်ႇငိုတ်ႈ ႁဵတ်းႁၢႆႉ တီႈၼိူဝ်ၵူၼ်းမိူင်းၶဝ်ၼႆ လႅင်ႇၶၢဝ်ႇ ၼႂ်းမိူင်းပွင်ႇမႃး။

မိူဝ်ႈဝၼ်းထီႉ 3.11.2012၊ ၶၢဝ်းယၢမ်း ၵၢင်ၶမ်ႈ 8 မူင်း၊ သိုၵ်းမၢၼ်ႈတပ်ႉ ၶမယ(508) ၸိုဝ်ႈၽူႈဢွၼ်ႁူဝ် ဢမ်ႇလႆႈႁူႉ ၵႂႃႇယိုဝ်းၵွင်ႈ တၢင်းတူၵ်းဝၢၼ်ႈ ၵဵင်းၶမ်းလူင်၊ ဢိူင်ႇၵဵင်းၶမ်းလူင် ဝဵင်းလွၵ်ႉၸွၵ်ႇဝႃႈၼႆ။

ၺႃးမိူဝ်ႈ ၶၢဝ်းဢွၵ်ႇဝႃႇလႄႈ ၵူၼ်းမိူင်းၶဝ် လႆႈၵႂႃႇၵၼ်ႇတေႃး တီႈဝတ်ႉ၊ သိုၵ်းမၢၼ်ႈၶဝ် လၢတ်ႈဝႃႈ ၵူၼ်းမိူင်းၵႂႃႇ သုၵ်ႉယုင်ႈၵဝ်းၶဝ်ၼႆသေ ဢဝ်ၵွင်ႈဢွၼ်ႇၶဝ် ယိုဝ်းလွၵ်ႇ ၵူၼ်းမိူင်း (10) ၵမ်း ႁဵတ်းႁႂ်ႈၵူၼ်းမိူင်း ပေႃးတူၵ်းၸႂ် ၵူဝ်ႁႅင်း လႆႈႁူႉမႃးၼင်ႇၼႆ။

ၼႂ်းဝၼ်းလဵဝ်ၵၼ် သိုၵ်းမၢၼ်ႈ တပ်ႉ ၶလယ ဢၼ်ၵႅမ်ၸဝ်ႈသိုၵ်း ယႄးထုတ်ႉ ဢွၼ်ႁူဝ်၊ ႁႅင်းသိုၵ်း (80) ၵေႃႉ ၵႂႃႇဢထမ်ႇမ တဵၵ်းတဵင် ယွၼ်းၵိၼ်မူ၊ ၵူၼ်းမိူင်း တီႈဝၢၼ်ႈၼႃးပိင်၊ ဢိူင်ႇမိူင်းၶုၼ်၊ ဝဵင်းမိူင်းၵိုင် ဝႃႈၼင်ႇၼႆ။

သိုၵ်းမၢၼ်ႈ ၸႂ်ႉၵူၼ်းမိူင်း ဢဝ်ၼိူဝ်ႉမူ တႃႇ (15) ၸွႆႉ မႃးပၼ်ၶဝ် သၢင်ႉငိုၼ်းတူၵ်းမႅၼ်ႈ (60000) ပျူး၊ ၵူၼ်းမိူင်း ၸိူဝ်းယူႇၸွမ်း ဝၢၼ်ႈၼွၵ်ႈ ၼႃးပၢင်ႇၼႆႉ မၢင်ၵေႃႉ ဢမ်ႇမီးငိုၼ်းၶဝ်ႈ ၼႂ်းႁိူၼ်းတင်းလိူၼ် ၵေႃႈမီး၊ ယႃႇဝႃႈ ႁူဝ်မိုၼ်ႇမၼ်း တေႃႈၼင်ႇ ႁူဝ်ႁဵင်မၼ်းၵူၺ်း တႃႇတေႁႃလႆႈ တုၵ်ႉၶၶၢၼ်ၸႂ်ၼႃႇၼႆ လႅင်ႇၶၢဝ်ႇ ၼႂ်းမိူင်း ၵေႃႉလၢတ်ႈၼႄ ၼင်ႇၼႆ။

တႆးလွတ်ႈလႅဝ်း