တပ်ႉသိုၵ်းမၢၼ်ႈၶိုၼ်ႈတိုၵ်းတပ်ႉသိုၵ်းၸိုင်ႈတႆး (SSPP/SSA) ၼႂ်းၸႄႈဝဵင်းၵျွၵ်ႉမႄး ပွတ်းမိူင်းမိတ်ႈ၊ တေႃႉသၢင်ႇ၊ မိူင်းငေႃႉ ၼႂ်းၸိုင်ႈတႆးပွတ်းႁွင်ႇႁၢဝ်ႈႁႅင်း၊ ႁွင်ႉႁူဝ်ပဝ်ႈဝၢၼ်ႈ ၸွပ်ႇထၢမ်ၸိုဝ်ႈႁူဝ်ၼႃႈသိုၵ်းတႆး။

တပ်ႉသိုၵ်းၸိုင်ႈတႆး (SSPP/SSA)

ဝၼ်းထိ 31/10/12 ယၢမ်း 17:45-20:40 မူင်း သိုၵ်းမၢၼ်ႈတပ်ႉၶမယ 503 ဢၼ်ၸဝ်ႈသိုၵ်းယႄးၼၢႆႇဢူး ဢွၼ်ႁူဝ် ႁႅင်းၵူၼ်း 100 ပၢႆ ၶိုၼ်ႈၸူးတပ်ႉသိုၵ်းၸိုင်ႈတႆး SSPP/SSA သၢႆသိုၵ်းတပ်ႉၸုမ်း 612 ဢၼ်မီး ၾၢႆႇႁွင်ႇၵျွၵ်ႉလူင်းၵျီး (ၵိင်ႇၸႄႈဝဵင်းမိူင်းမိတ်ႈ)၊ သွင်ၾၢႆႇလႆႈပဵၼ်ပၢင်တိုၵ်းၵၼ်ႁၢဝ်ႈႁႅင်း၊ ၾၢႆႇသိုၵ်းမၢၼ်ႈတၢႆ 6 ၵေႃႉ၊ ဝၢတ်ႇၸဵပ်း 5 ၵေႃႉ၊ ၾၢႆႇသိုၵ်းတႆး ဢမ်ႇမီးလွင်ႈလုသုမ်း။

ဝၼ်းထိ 02/11/12 ယၢမ်း 09:30-10:00 မူင်း၊ တပ်ႉသိုၵ်းမၢၼ်ႈၶိုၼ်ႈၸူးသၢႆသိုၵ်းတပ်ႉၸုမ်း 612 ဢၼ်မီးႁိမ်းၵိၼ်ၸိ ၼႂ်းၵိင်ႇၸႄႈဝဵင်းမိူင်းငေႃႉသေ လႆႈပဵၼ်ပၢင်တိုၵ်းၵၼ်ထႅင်ႈ။ လႆႈႁူႉဝႃႈ ၾၢႆႇသိုၵ်းမၢၼ်ႈၸၼ်ႉၸဝ်ႈႁၢၼ်တိူဝ်ႉဝၢတ်ႇၸဵပ်း ၵႂႃႇမိူဝ်းတၢႆတီႈၵျွၵ်ႉမႄးၵေႃႉၼိုင်ႈ ၾၢႆႇသိုၵ်းတႆးဢမ်ႇမီးၽႂ်ဝၢတ်ႇၸဵပ်း လူမ်ႉတၢႆ-ဝႃႈၼႆ။

ဝၼ်းထိ 04/11/12 ယၢမ်း 14:00-16:30 မူင်း သိုၵ်းမၢၼ်ႈၶလယ 23 ဢၼ်ၸဝ်ႈသိုၵ်းတၢၼ်းထုၼ်းဢွင်ႇ ဢွၼ်ႁူဝ် ႁႅင်းၵူၼ်း 90 ၶိုၼ်ႈၸူးသၢႆသိုၵ်းတပ်ႉၸုမ်း 612 SSPP/SSA ဢၼ်မီးတီႈ ၵွင်သလၢမ်း (ပၢင်ႇလေႃႉ) ၵိင်ႇၸႄႈဝဵင်းမိူင်း ငေႃႉသေ လႆႈပဵၼ်ပၢင်တိုၵ်းၵၼ်ထႅင်ႈ။ ၵူၼ်းမိူင်းငေႃႉလၢတ်ႈဝႃႈ သိုၵ်းမၢၼ်ႈႁၢမ်ၵူၼ်း ဝၢတ်ႇၸဵပ်းၶဝ်ၵႂႃႇမိူဝ်းတီႈမိူင်းငေႃႉ 4 ႁၢမ်၊ ၾၢႆႇတပ်ႉသိုၵ်းၸိုင်ႈတႆးဢမ်ႇမီးလွင်ႈဝၢတ်ႇၸဵပ်းလူမ်ႉတၢႆ-ၼႆယဝ်ႉ။

ထိုင်မႃးဝၼ်းထိ 09/11/12 ယၢမ်း 08:00-13:00 မူင်း၊ သိုၵ်းမၢၼ်ႈၶိုၼ်ႈၸူးသၢႆသိုၵ်းတပ်ႉသိုၵ်းၸိုင်ႈတႆးဢၼ်မီးတီႈဝၢၼ်ႈ လွႆလဵၵ်း၊ ဢိူင်ႇမိူင်းၵုင်း ၸႄႈဝဵင်းတေႃႉသၢင်ႇလႄႈ လႆႈပဵၼ်ပၢင်တိုၵ်းၵၼ်တင်းႁၢင်ႈ (ၶိုင်ႈဝၼ်း)၊ သွင်ၾၢႆႇမီးလွင်ႈဝၢတ်ႇ ၸဵပ်းၼင်ႇၵၼ်သေ ဝၼ်းထိ 10/11/12 (မိူဝ်ႈၼႆႉ)ပွတ်းၼႂ် သွင်ၾၢႆႇ တိုၵ်ႉငႃၵၼ်ဝႆႉ၊ ႁၢင်ႈႁႅၼ်းတေၶဝ်ႈၸူးၵၼ်ထႅင်ႈ- ၵူၼ်းၼႂ်းပိုၼ်ႉတီႈပွင်ႇမႃးၼင်ႇၼႆ။

တပ်ႉသိုၵ်းမၢၼ်ႈ ဢၼ်ၽိူမ်ထႅမ်ႁႅင်းသိုၵ်းၶဝ်ႈတူင်ႉၼိုင်ၼႂ်းတူင်ႇတၢင်ႇပွတ်းတွၼ်ႈၼႆႉထႅင်ႈ ပဵၼ်တပ်ႉၶမယ 501, 502, 503 လႄႈ ၶလယ 23 ၊ တပ်ႉၵွင် 71 ဢွင်ႇလၢၼ်ႇ (မိူင်းမၢၼ်ႈ)၊ တပ်ႉၵွင် 95 မၼ်းတလေးၸိူဝ်းၼႆႉ။

ဝၢႆးပၢင်တိုၵ်းယဝ်ႉ သိုၵ်းမၢၼ်ႈ 4 တပ်ႉၵွင်ၼႆႉ ႁွင်ႉႁူဝ်ပဝ်ႈဝၢၼ်ႈၶိုမ်းၵဝ်ႇ၊ ၶိုမ်းမႂ်ႇ ၵႂႃႇၸွပ်ႇထတ်းထတ်းထၢမ် လွၵ်ႇငိုတ်ႈဝႃႈ ႁူဝ်ၼႃႈသိုၵ်းတႆးဢၼ်ႁဝ်းယိုဝ်းၵၼ်ၼႆႉၸိုဝ်ႈသင်၊ ပေႃးသူဢမ်ႇလၢတ်ႈ ႁဝ်းတေဢဝ်လိူင်ႈသူ- ၵူၼ်းၼႂ်းပိုၼ်ႉတီႈသိုပ်ႇ လၢတ်ႈၼင်ႇၼႆ။