မိူဝ်ႈပူၼ်ႉမႃးဝၼ်းထီႉ 1.11.2012၊ ယၢမ်းၵၢင်ၶမ်ႈ 8 မူင်း၊ သိုၵ်းမၢၼ်ႈ တပ်ႉ ၶမယ (269) ၽူႈဢွၼ်ႁူဝ် ၵႅမ်ၸဝ်ႈသိုၵ်း ယႄးထုတ်ႉ၊ ႁႅင်းသိုၵ်း (80) ပၢႆ လုၵ်ႉဝၢၼ်ႈပႃႇၼေႃႇသေ ၵႂႃႇဝၢၼ်ႈၼမ်ႉမဵၼ်၊ ဢိူင်ႇဝၢၼ်ႈ ယိူင်း၊ ဝဵင်းလၢႆးၶႃႈ ၵႂႃႇလၵ်ႉၵိၼ်ၵႆႇ လႄႈၶဝ်ႈသၢၼ် ၵူၼ်းမိူင်းဝၢၼ်ႈၼမ်ႉမဵၼ်ၼႆ လႅင်ႇၶၢဝ်ႇ ပွင်ႇမႃး။

ၸိူဝ်းလႆႈသုမ်း -(1) ၶဝ်ႈသၢၼ်ၼႃႈဝၢၼ်ႈ 2 ၶႂၢႆး၊ (2) ၼၢႆးမႄႈဢွင်ႇ သုမ်းၵႆႇ 1 တူဝ်၊ (3) ၼၢႆးမႄႈဢေး ၵႆႇ 1 တူဝ်၊ (4) မႄႈသၢင်ႇလူႇ ၵႆႇ 1 တူဝ် လႆႈႁူႉမႃးၼင်ႇၼႆ။

ၼႂ်းဝၼ်းလဵဝ်ၵၼ် သိုၵ်းမၢၼ်ႈတပ်ႉ ၶမယ (336) ၸဝ်ႈႁၢၼ် တၢၼ်းၵျေႃႇ၊ ႁႅင်းသိုၵ်း (52) ၵေႃႉ လုၵ်ႉတီႈ တပ်ႉၵွင်းတၼ်သေ ၵႂႃႇတီႈ ၶၢမ်းထမ်ႈၽြႃး၊ ဢိူင်ႇဝၢၼ်ႈႁႅင်ႈ၊ ဝဵင်းၼမ်ႉၸၢင် ၵႂႃႇဢဝ်ၵိၼ်ၶူဝ်းၶွင်လၢႆ ၵူၼ်းမိူင်းၸိူဝ်းမႃးႁဵတ်းသူၼ်ဝႃႈၼႆ။

ၸိူဝ်းလႆႈသုမ်းၶူဝ်းၶွင်-

(1)    ၸၢႆးထိ ဢႃယု (35) ပီႊ သုမ်းၵႆႇ 1 တူဝ် သၢင်ႉငိုၼ်း – 5ꨲ000 ပျူး
(2)    လုင်းလေႉ ဢႃယု (40) ပီႊ ၵႆႇ 1 တူဝ် သၢင်ႉငိုၼ်း – 5ꨲ000 ပျူး
(3)    ၼၢင်းလူၼ်း ဢႃယု (30) ပီႊ  ပီႇယႃႇ (1) ၽႃႇ သၢင်ႉငိုၼ်း – 15ꨲ000 ပျူး
(4)    ၼၢင်းၶမ်း ဢႃယု (30) ပီႊ ၶဝ်ႈသၢၼ် (1) ပုင်း သၢင်ႉငိုၼ်း – 8ꨲ000 ပျူး
(5)    ၸၢႆးတဵင်းၵျေႃႇ ဢႃယု (24) ပီႊ MP-4 ၼိုင်ႈလုၵ်ႈ သၢင်ႉငိုၼ်း – 15000 ပျူး

သိုၵ်းမၢၼ်ႈၶဝ်ၼႆႉ ႁဵတ်းလွင်ႈမိူၵ်ႈလိူင်း မဵဝ်းၼိုင်ႈယဝ်ႉမဵဝ်းၼိုင်ႈ တဵၵ်းတဵင်၊ ပႄႉၵိၼ်၊ ၵၼ်ႉၸၼ်၊ လူလၢႆ၊ ဢဝ်ၶူဝ်းၶွင်လၢႆၵူၼ်းမိူင်း၊ ပေႃႉထုပ်ႉ၊ ႁဵတ်းႁၢႆႉၶႃႈႁႅမ်တၢႆ၊ ယွၼ်းငိုၼ်းတီႈၵူၼ်းမိူင်း ပေႃးႁဵတ်းၼႆယူႇတိၵ်း” ၵၢၼ်ပူၼ်ႉပႅၼ် သုၼ်ႇလႆႈ သုၼ်ႇပဵၼ်ၵူၼ်း တေဢမ်ႇၸၢင်ႈ ယုပ်ႈယွမ်းလူင်းလႆႈၼႆ ၵူၼ်းမိူင်းၶဝ် ႁၼ်ထိုင် ၸိူင်ႉၼင်ႇၼႆ။

တႆးလွတ်ႈလႅဝ်း