ၼႂ်းလိူၼ်ၼူဝ်ႊဝႅမ်ႊၿိူဝ်ႊ (2012)ၼႆႉတေမီးပၢင်ဢုပ်ႇဢူဝ်း ၸၼ်ႉၸိုင်ႈမိူင်းႁူမ်ႈတုမ် (ပွၵ်ႈၵမ်း 3) ဝူင်ႈၵၢင် RCSS တင်း လူင်ပွင်ၸိုင်ႈတဵင်းၸဵင်ႇ၊ ယိူင်းဢၢၼ်းပိူင်လူင် ပိူဝ်ႈတႃႇၶၵ်ႉၵၢၼ်လွင်ႈငမ်းယဵၼ် 4 ၶၼ်ႈတွၼ်ႈ။

ၸဝ်ႈယွတ်ႈသိုၵ်း ႁူဝ်ပဝ်ႈၶွင်ႊသီႊဢဝ်ၶိုၼ်းၸိုင်ႈတႆး RCSS/SSA လၢတ်ႈဝႃႈ- ပၢင်ဢုပ်ႇဢူဝ်းၼႆႉ ၾၢႆႇတႆး (RCSS/SSA) ပဵၼ်ၶွမ်ႊမတီႊဢုပ်ႇဢူဝ်း လွင်ႈငမ်းယဵၼ်ၸၼ်ႉၸိုင်ႈမိူင်းႁူမ်ႈတုမ် RCSS (ၸူဝ်ႈၶၢဝ်း) ဢၼ်ၵႅမ်ၸွမ်ႁၢၼ်ပွင်ၶိူဝ်းဢွၼ် ႁူဝ်ၼမ်းၼႃႈၵႂႃႇၶဝ်ႈႁူမ်ႈ၊ တႃႇတူဝ်ၵဝ်ႇတႄႉတေပႂ်ႉတူၺ်းငဝ်းလၢႆးထႅင်ႈၵွၼ်ႇ။ ၾၢႆႇမၢၼ်ႈ ၸုမ်းလူင်ပွင်ၸိုင်ႈတဵင်းၸဵင်ႇ [ၵႅမ်ႁူဝ်ပဝ်ႈၶွမ်ႊမတီႊၶိုင်ပွင်လွင်ႈငမ်းယဵၼ် ၸိုင်ႈမိူင်းႁူမ်ႈတုမ် (UPWC)] ဢူးဢွင်ႇမိၼ်း ၸိူဝ်းၼႆႉ။ ၵူၺ်းၵႃႈ ႁၢၼ်ႉတေႃႇ မိူဝ်ႈလဵဝ် ယင်းပႆႇလႆႈတတ်းမၵ်း လွင်ႈတေဢုပ်ႇ ၵၼ်ဝၼ်းလႂ်၊ တီႈလႂ်ၸိူဝ်းၼႆႉ- ဝႃႈၼႆ။

ပၢင်ၵုမ်ပွၵ်ႈၵမ်းၼႆႉ ၾၢႆႇ RCSS/SSA တေတၢင်ႇလၢတ်ႈမီးပိူင်လူင် 4 လွင်ႈ – 1.ၵဵဝ်ႇၵပ်းလွင်ႈႁူမ်ႇလူမ်ႈၸုမ်းလူလွမ်ပၵ်း တႃလွင်ႈငမ်းယဵၼ်။ 2.လွင်ႈ RCSS တေလူင်းသူၼ်းတုမ်ၵူၼ်းမိူင်း ၵဵဝ်ႇၵပ်းၶၵ်ႉၵၢၼ်လွင်ႈငမ်းယဵၼ်။ 3.လွင်ႈၵိုတ်းယိုဝ်း ၵၼ်မႃး ႁႂ်ႈဢွၵ်ႇၼမ်ႉဢွၵ်ႇတူဝ်။ 4.ၵၢၼ်သၢင်ႈလွင်ႈယုမ်ႇယမ်ၵၼ် ၸိူဝ်းၼႆႉ။

ၵဵဝ်ႇၵပ်းပိူင်လူင် 4 ၶေႃႈၼႆႉ ၸဝ်ႈယွတ်ႈသိုၵ်း သပ်းၸႅင်ႈၼႄဝႃႈ- ၶေႃႈထိ 1.ပိူဝ်ႈတႃႇႁႂ်ႈၽူႈလူလွမ်ပၵ်းတႃ လွင်ႈငမ်းယဵၼ် မီးလွင်ႈႁူမ်ႇလူမ်ႈလွတ်ႈၽေး၊ ယႃႇႁႂ်ႈလူင်ပွင်ၸိုင်ႈသိုၵ်းမၢၼ်ႈႁၼ်ၽိတ်းၼိူဝ်ၶဝ်။ ႁႂ်ႈမီးသုၼ်ႇလႆႈလူလွမ်ပၵ်းတႃၸွမ်း လွင်ႈငမ်းယဵၼ်ထၢင်ႇႁၢင်ႈလွတ်ႈလႅဝ်း၊ လွင်ႈငိုၼ်းလိူၼ်ၶဝ်ၵေႃႈႁႂ်ႈလူင်ပွင်ၸိုင်ႈတူၺ်းထိုင်ပၼ်။ ၸုမ်းၽူႈလူလွမ်ပၵ်းတႃ လွင်ႈငမ်းယဵၼ်ၼႆႉ ၾၢႆႇတႆး လႆႈလိူၵ်ႈဝႆႉၵူၼ်း ၼႂ်းမိူင်းၵူႈၸႄႈဝဵင်း 19 ၵေႃႉ၊ ၾၢႆႇလူင်ပွင်ၸိုင်ႈၵေႃႈတေမီးထႅင်ႈ၊ 2 ၸုမ်း ၼႆႉ တေႁူမ်ႈၵၼ်ႁဵတ်းၵၢၼ်။

2.ဢိင်ၼိူဝ်ႁဝ်းမီးၶေႃႈတူၵ်းလူင်းၵၼ်ဝႆႉ ၵဵဝ်ႇၵပ်းလွင်ႈလူလွမ်ၵုမ်းတူၺ်းလွင်ႈငမ်းယဵၼ်ၼၼ်ႉ ႁႂ်ႈတၢင်း RCSS လႆႈလူင်းပိုၼ်ႉတီႈသူၼ်းတုမ်ၵူၼ်းမိူင်းၵူႈၸႄႈမိူင်း၊ လွင်ႈဝႃႈၵၢၼ်ၵိုတ်းယိုဝ်းၵၼ်မီးသင်လၢႆလၢႆ ႁႂ်ႈၵူၼ်းမိူင်းႁပ်ႉႁူႉ။ ႁႂ်ႈၾၢႆႇလူလွမ်ပၵ်းတႃလွင်ႈငမ်းယဵၼ်ႁဵတ်းၵၢၼ်ငၢႆႈ။

3.ႁဝ်းၵိုတ်းယိုဝ်းၵၼ်မႃး ၶၢဝ်းတၢင်းပီပၢႆယဝ်ႉ ဢၼ်ႁဵတ်းလႆႈၵၢၼ်ထူပ်းမိုဝ်းဢမ်ႇမီးသင်၊ လွင်ႈၾၢႆႇတပ်ႉသိုၵ်းမၢၼ်ႈၵႂႃႇ ယိုဝ်း SSA ၵူၼ်းႁဝ်းၸိူဝ်းၼႆႉ ၶႂ်ႈႁႂ်ႈလူင်ပွင်ၸိုင်ႈၶဝ်မႄးၵႄႈလိတ်ႈ။ လၢႆးၵႄႈလိတ်ႈမၼ်းၼႆႉ ႁဝ်းယွၼ်းတင်ႈလုမ်းထႅင်ႈ တီႈမိူင်းပၼ်ႇ (ၸိုင်ႈတႆးပွတ်းၸၢၼ်း)- ၵျွၵ်ႉမႄး (ၸိုင်ႈတႆးပွတ်းႁွင်ႇ)။ ၼွၵ်ႈသေ ၼၼ်ႉၵေႃႈ ႁႂ်ႈလႆႈမီးလွင်ႈဢုပ်ႇဢူဝ်း ၵၼ်၊ ၶဝ်ႈႁႃၵၼ်၊ ႁႂ်ႈမီးလွင်ႈယုမ်ႇယမ်ၵၼ်၊ ယႃႇႁႂ်ႈၵူၼ်းမိူင်းလႄႈ ၵူၼ်းသိုၵ်းႁၼ်ၽိတ်း။

4.ၵၢၼ်တေႁူမ်ႈၵၼ်ပူၵ်းပွင်ဝၢၼ်ႈမိူင်းၼၼ်ႉ ၶႂ်ႈႁႂ်ႈမီးလွင်ႈဝႆႉဝၢင်းၸႂ်ၵၼ်၊ ယႃႇပေမီးလွင်ႈထၢင်ႇထိူမ်ၼိူဝ်ၵၼ် ပူၼ်ႉတီႈ။ ပေႃးမီးလွင်ႈထၢင်ႇထိူမ်ႁၼ်ၽိတ်းၼိူဝ်ၵၼ်ၸိုင် ယုၵ်ႉတူဝ်ယၢင်ႇ ၵိုတ်းသိုၵ်းၵၼ်မႃးမိူၼ်ၼင်ႇ ၸုမ်းၶၢင် KIA တင်း KNPP လႆႈၶၢဝ်းတၢင်း 20 ပီယဝ်ႉၵေႃႈတိုၵ်းယိုဝ်းၵၼ်ၶိုၼ်း၊ လွင်ႈၼႆႉ ၵွပ်ႈပိူဝ်ႈ မီးလွင်ႈထၢင်ႇထိူမ်ႁၼ်ၽိတ်းၼိူဝ်ၵၼ်လႄႈ ဢမ်ႇမီးလွင်ႈယုမ်ႇယမ်ၵၼ်။
ယူႇတီႈၸုမ်းၶၢဝ်ႇၽူႈတွႆႇႁွၵ်ႈတွင်ႈထၢမ်သေ ၸဝ်ႈယွတ်ႈသိုၵ်း တွပ်ႇလၢတ်ႈဝႃႈ- ပေႃးဝႃႈတင်ႈလုမ်းထႅင်ႈယုမ်ႇယမ်ဝႃႈလွင်ႈ ၵပ်းသၢၼ်ၵၼ်တေလီၶိုၼ်ႈမႃး၊ မိူဝ်ႈလဵဝ် တၢင်းမိူင်းတႆးပွတ်းႁွင်ႇမီးပၼ်ႁႃလိူဝ်မိူင်းတႆးပွတ်းၸၢၼ်း၊ ပၼ်ႁႃၸၢင်ႈယွမ်း လူင်းဢိတ်းၼိုင်ႈ။ ၵူၺ်းၵႃႈ ပၼ်ႁႃယွမ်းလူင်း ႁိုဝ် ဢမ်ႇယွမ်းလူင်းၼၼ်ႉ ပိူင်လူင်မၼ်းမီးတီႈတပ်ႉသိုၵ်းမၢၼ်ႈ၊ တင်ႈလုမ်း ဢမ်ႇတင်ႈလုမ်းၵေႃႈ ပေႃးတပ်ႉသိုၵ်းမၢၼ်ႈၶႂ်ႈႁႂ်ႈပၼ်ႁႃ လူတ်းယွမ်း မၼ်းၵေႃႈၸၢင်ႈလူတ်းယွမ်းယူႇ- ဝႃႈၼႆ။

ယူႇတီႈၸဝ်ႈယွတ်ႈသိုၵ်း ၾၢၵ်ႇၵႂၢမ်းဝႃႈ- ပိူဝ်ႈတႃႇႁႂ်ႈၸိုင်ႈမိူင်းႁူမ်ႈတုမ် တေၶိုၼ်ႈယႂ်ႇၵတ်းယဵၼ်ၼၼ်ႉ ၵူႈၾၢႆႇၾၢႆႇထုၵ်ႇမေႃ ၶဝ်ႈႁႃၵၼ်၊ မီးလွင်ႈယုမ်ႇယမ်ၵၼ်။ ပေႃးဝႃႈ ဢမ်ႇၶဝ်ႈႁႃၵၼ်၊ ဢမ်ႇယုမ်ႇယမ်ၵၼ်၊ မီးလွင်ႈထၢင်ႇထိူမ်ႁၼ်ၽိတ်းၼိူဝ်ၵၼ်၊ ယူႇၾၢႆႇပေႉပုၼ်ႈသေပေႉၵိၼ်ၵၼ်ၸိုင် လွင်ႈငမ်းယဵၼ်ဢၼ်ဝႃႈ ၼၼ်ႉ တိုၼ်းဢမ်ႇၵိူတ်ႇၶိုၼ်ႈလႆႈ- ဝႃႈၼႆ။