ၵူၼ်းဝၢၼ်ႈႁေႃၼႃး ၸႄႈဝဵင်းၼမ်ႉတူႈ ၸိုင်ႈတႆး ပွတ်းႁွင်ႇ ၵႂႃႇပိတ်းၶဝ်ႈၵၢပ်ႇၼႂ်းသူၼ်၊ တူၵ်းၸႂ်ၵူဝ်ႁႄ လႅၼ်ႈပၢႆႈသိုၵ်းမၢၼ်ႈ လတ်းၽၢၼ်ႇမႃးတၢင်းသူၼ်၊  ၺႃးသိုၵ်းမၢၼ်ႈဢဝ်ၵွင်ႈယိုဝ်းသႂ်ႇ လႆႈၶဝ်ႈႁူင်းယႃ။

ပူၼ်ႉမႃးမိူဝ်ႈဝၼ်းထိ 06/11/12 ယၢမ်းဝၢႆးဝၼ်း 2 မူင်း ၽွင်းၸၢႆးဢွင်ႇ (ဢႃႇယု 35) တင်းမေးၼၢင်း (ပႃးလုၵ်ႈဢွၼ်ႇၵႂႃႇ သူၼ်) ၽွင်းတိုၵ်ႉပိတ်းၶဝ်ႈၵၢပ်ႇယူႇၼႂ်းသူၼ်ၼၼ်ႉ သိုၵ်းမၢၼ်ႈတပ်ႉၶလယ 243 ၼမ်ႉလၼ်ႈ၊ ဢၼ်ၵႂႃႇတူင်ႉၼိုင်ပွတ်း ဝၢၼ်ႈႁေႃၼႃး ၼႂ်းဢိူင်ႇမိူင်းယဵၼ် ၸႄႈဝဵင်းၼမ်ႉတူႈ၊ လတ်းၽၢၼ်ႇၵႂႃႇ တၢင်းသူၼ်ၶဝ်ႈၵၢပ်ႇ ၸၢႆးဢွင်ႇ။ မၼ်းၸၢႆးတူၵ်းၸႂ်၊ ၵူဝ်သိုၵ်းမၢၼ်ႈတိၺွပ်းႁၢပ်ႇၶျေႃးလႄႈလႅၼ်ႈပၢႆႈ၊ သိုၵ်းမၢၼ်ႈၵေႃႈ လၢၵ်ႈၵွင်ႈယိုဝ်းႁၢတ်ႇသႂ်ႇ – ၵူၼ်းမိူင်းယဵၼ် ဢၼ်ႁွတ်ႈဝဵင်း ၼမ်ႉတူႈ ၵေႃႉၼိုင်ႈလၢတ်ႈ ၼင်ႇၼႆ။

ၸၢႆးဢွင်ႇၺႃးယိုဝ်း မၢၵ်ႇၵွင်ႈသၢတ်ႈၺႃးတီႈဢိုၵ်း၊ တိူဝ်ႉတီႈၶႅၼ်၊ တီႈၶႃလူင်။ ၸၢၵ်ႇမၢၵ်ႇၵွင်ႈ ၽူင်ႉသႂ်ႇၺႃးပႃးလုၵ်ႈဢွၼ်ႇ မၼ်း ဢႃႇယု 4 ၶူပ်ႇ တီႈၼႃႈၽၢၵ်ႇ၊ မိူဝ်ႈလဵဝ်တင်းပေႃႈတင်းလုၵ်ႈတိုၵ်ႉၶဝ်ႈႁူင်းယႃၼမ်ႉတူႈ- ၵူၼ်းၼႂ်းပႃႇတီႇၵၢၼ်မိူင်း ၶဝ်လၢတ်ႈၼင်ႇၼႆ။

ၵဵဝ်ႇၵပ်းလွင်ႈၼႆႉ ၽွင်းတႅၼ်းၸႄႈမိူင်းၵျွၵ်ႉမႄး ၼၢင်းၶမ်းဢေး ၵေႃႈလၢတ်ႈဝႃႈ- လွင်ႈၼႆႉၸႂ်ႈတႄႉ၊ ၵူၺ်းၵႃႈ ၵူၼ်းဝၢၼ်ႈ ပႆႇမႃးတၢင်ႇလၢတ်ႈသင်၊ ႁဝ်းၶႃႈတိုၵ်ႉပွႆႇၵူၼ်းၵႂႃႇၸွပ်ႇထတ်းတူၺ်းလွင်ႈတၢင်းပိူင်ပဵၼ်မၼ်းယူႇ၊ ၵႃႈပူၼ်ႉမႃးဢၼ်ၵူၼ်း ဝၢၼ်ႈမႃးတၢင်ႇလၢတ်ႈၵမ်းသိုဝ်ႈသေ လႆႈဢဝ်လိူင်ႈလၢဝ်းဢုပ်ႇၼႂ်းသၽႃးၵေႃႈပႆႇမီး – ဝႃႈၼႆ။

ပူၼ်ႉမႃးဢမ်ႇႁိုင်ၼႆႉ ဢိင်ၼိူဝ်သိုၵ်းတႆးတူင်ႉၼိုင်ၵႂႃႇမႃးၼႂ်းၸႄႈဝဵင်းၼမ်ႉတူႈသေ သိုၵ်းမၢၼ်ႈႁွင်ႉၵၢင်ႉၵႄႇၽူႈၵွၼ်းဝၢၼ်ႈ ဢိူင်ႇၶဝ်ၶွၼ်ႈတုမ်ၵၼ်၊ ႁၢမ်ႈဝႃႈတၵ်းဢမ်ႇလႆႈတိတ်းတေႃႇၵပ်းသိုပ်ႇသိုၵ်းတႆး၊ ၽႂ်တိတ်းတေႃႇ သိုၵ်းတႆးတေပၼ်တူတ်ႈ တၢမ်ႇၶွၵ်ႈ။ ဢွၼ်တၢင်းၼၼ်ႉၵေႃႈ ၵူၼ်းဝၢၼ်ႈမွၵ်ႈႁိမ်း 10 ၵေႃႉ ၺႃးသိုၵ်းမၢၼ်ႈ တိၺွပ်းပေႃႉထုပ်ႉသႂ်ႇၶွၵ်ႈ၊ ၵမ်ႈၽွင်ႈထိုင် တီႈၶႃႁၵ်းမိုဝ်းၵႅင်ႉ၊ ဢၼ်တၢႆၵႂႃႇၵေႃႈမီး- ၼႆယဝ်ႉ။