ဢိင်ၼိူဝ်ႁၢႆးငၢၼ်း (Report) ၶွင်ၸုမ်း UNODC လၢတ်ႈ ဝႃႈ ပီၼႆႉ မိူင်းမၢၼ်ႈ တင်းမိူင်းလၢဝ်း ၽုၵ်ႇယႃႈၾိၼ်ႇ တိူဝ်းမႃးလိူဝ်ၵဝ်ႇသေလႆႈထတ်းသၢင်ဝႆႉၼင်ႇၼႆ။ပေႃးႁဝ်းတူၺ်းငဝ်းလၢႆးမိူဝ်ႈလဵဝ်ၸိုင် တပ်ႉသိုၵ်းမၢၼ်ႈတင်းလူင်ပွင်ၸိုင်ႈ ၵႂႃႇၵေႃႉႁူးၵေႃႉတၢင်းၵူႈတီႈ၊ မိူၼ်ၼင်ႇလူင်ပွင်ၸိုင်ႈဝႃႈ ႁဝ်းတေပူၵ်းပွင်မူၼ်ႉမႄးဝၢၼ်ႈမိူင်း၊ မူၼ်ႉမႄးတူင်ႇဝူင်းၵူၼ်းၼႆသေ ႁဵတ်းသၢင်ႈ ၶိုင်ပွင်ယူႇ၊ ၼႂ်းၶူးၼႂ်းဝဵင်းၼႆႉ လွင်ႈပူၵ်းပွင်ဝၢၼ်ႈမိူင်း/တူင်ႇဝူင်း ၵူၼ်းၸိူဝ်းၼႆႉ တိုၼ်းႁၼ်လႆႈ ၸႅင်ႈၸႅင်ႈယူႇ။ ၵူၺ်းၵႃႈ ပွတ်းဝၢၼ်ႈၼွၵ်ႈတီႈသိုၵ်းၽွင်းငမ်းၼၼ်ႉ ယင်းတိုၵ်ႉမိူၼ်ၵဝ်ႇ၊ မၢင်တီႈယင်းႁၢႆႉ ႁႅင်းလိူဝ်ၵဝ်ႇ လူးၵွၼ်ႇ။ လူင်ပွင်ၸိုင်ႈၵိုတ်းသိုၵ်း၊ ၵူၺ်းၵႃႈ ၾၢႆႇသိုၵ်းသမ်ႉသိုပ်ႇႁၢင်ႈသိုၵ်း တိုၵ်းယိုဝ်းတိၵ်းတိၵ်း။ ၵွပ်ႈပိူဝ်ႈဝႃႈ လွင်ႈၵႂၢတ်ႇ လၢင်ႉၼႃႈလိၼ်၊ လွင်ႈႁူမ်ႇငမ်းၼႃႈလိၼ်ၸိူဝ်းၼႆႉ တေႃႇမိူဝ်ႈလဵဝ်ၵေႃႈ တပ်ႉသိုၵ်းမၢၼ်ႈ ဢမ်ႇၵိုတ်းဢမ်ႇယင်ႉ၊ ၵွပ်ႈၼၼ် ၼႂ်းမိူင်းယၢင်း၊ ယၢင်းလႅင်၊ မိူင်းတႆး တိုၵ်းမီးၵၢၼ်တိုၵ်းယိုဝ်းၵၼ်ယူႇ။ တင်ႈတႄႇၵိုတ်းယိုဝ်းၵၼ်မႃး ပဵၼ်ပၢင်တိုၵ်းႁူမ်ႈၵၼ်ဢမ်ႇၶႂ်ႈယွမ်း 100 ပွၵ်ႈ။

သိုပ်ႇလၢတ်ႈဝႃႈ- ယႃႈမဝ်းၵမ်ၵေႃႈ ငဝ်းလၢႆးမၼ်းမိူၼ်ၵၼ်၊ ၸုမ်း UNODC လၢတ်ႈယူႇဝႃႈ မိူဝ်ႈလဵဝ် လူင်ပွင်ၸိုင်ႈမႃးၶဵၼ်ႇတႅမ်ႈၽႅၼ်ၵၢၼ် လူင် 3 ပီ ပိူဝ်ႈတႃႇၸွႆႈထႅမ်ၵူၼ်းၽုၵ်ႇယႃႈ၊ ၵူၺ်းၵႃႈ တၢင်းတပ်ႉသိုၵ်း မၢၼ်ႈသမ်ႉတိုၵ်ႉတိုၵ်းသူၼ်းၵူၼ်းၽုၵ်ႇယႃႈၶဝ်ႁႂ်ႈသိုပ်ႇၽုၵ်ႇယႃႈ ယူႇ။ ပီႇတုၸိတ်ႉ တီႈမိူင်းတႆးပွတ်းဢွၵ်ႇၶဝ် လၢတ်ႈတီႈၵူၼ်းဝၢၼ်ႈဝႃႈ- ပေႃးသူၸဝ်ႈဢမ်ႇၽုၵ်ႇယႃႈသူတေႁဵတ်းႁိုဝ်မီးငိုၼ်း၊ ပေႃးဢမ်ႇ မီးငိုၼ်း သမ်ႉတေ ႁဵတ်းႁိုဝ်လဵင်ႉႁဝ်းတင်း သိုၵ်းမၢၼ်ႈ – ဝႃႈၼႆ။

မိူဝ်ႈဢုပ်ႇၵၼ်လွင်ႈယႃႈမဝ်းၵမ်တီႈတႃႈၶီႈလဵၵ်းၵေႃႈ  တူၵ်းလူင်းၵၼ်တေလိူၵ်ႈပိုၼ်ႉတီႈၼႂ်း 2 ၸႄႈဝဵင်း မိူင်းတႆးပွတ်းၸၢၼ်း ပိူဝ်ႈတႃႇ လူင်းမိုဝ်းႁဵတ်းသၢင်ႈ ၶူင်းၵၢၼ်ၼမ်းႁွင်ႈ ၽုၵ်ႇတႅၼ်းတူၼ်ႈၾိၼ်ႇ။ ဢၼ်ဢုပ်ႇ ၵၼ်ၼႆႉ  ဢမ်ႇလၢတ်ႈတူၵ်းပႃးၶိူဝ်းၵူၼ်းႁဵတ်းဢွၵ်ႇ/ သိုဝ်ႉၶၢႆယႃႈ/ၵႄႇယႃႈလူင်ပဵၼ်ၽႂ်၊ တေႁဵတ်းႁိုဝ် ႁင်းၶဝ်ၸိူဝ်းၼႆႉ၊ ၵွပ်ႈဝႃႈ ၶဝ်ၸိူဝ်းၼႆႉပဵၼ်ဢူၺ်းလီၶွင်ၾၢႆႇသိုၵ်း။ ပေႃးႁႂ်ႈယႃႈမဝ်းၵမ် မူတ်းႁၢႆ ၵူႈၾၢႆႇၾၢႆႇ ထုၵ်ႇလႆႈဢုပ်ႇလွင်ႈၵၢၼ်မိူင်းၸိူဝ်းၼႆႉ ၽႂ်ဢမ်ႇဢုပ်ႇ။ ၵွပ်ႈပႆႇဢုပ်ႇၵၼ်ၵၢၼ်မိူင်းလႄႈ ဢၼ်ၶဝ်တူၵ်းလူင်းၵၼ် ပဵၼ်ပိူဝ်ႈတႃႇၵေႃႇသၢင်ႈလွင်ႈယုမ်ႇယမ်ၵၼ်ၵူၺ်း၊ ပႆႇၸႂ်ႈပိူဝ်ႈတႃႇၽဵဝ်ႈယႃႈမဝ်းၵမ် ႁႂ်ႈပေႃးမူတ်းႁၢႆ- ဝႃႈၼႆ။

ၵပ်းၵၢႆႇလွင်ႈယႃႈၼႆႉ မိူဝ်ႈပၢင်ၵုမ်တီႈၵဵင်းမႆႇၼႂ်းဝူင်ႈပူၼ်ႉ (ၽွင်းႁၢင်လိူၼ်ဢွၵ်ႊထူဝ်ႊၿိူဝ်ႊ)ၼႆႉ ၽူႈတႅၼ်း လႃးႁူႇၵေႃႉၼိုင်ႈလၢတ်ႈဝႃႈ- ပေႃးပဵၼ်မုၼ်ၸဝ်ႈၶရိယၼ်ႇၼႆႉ ၽုၵ်ႇယႃႈၽိတ်းတႄႉတႄႉ။ ၵူၺ်းၵႃႈ ဢၼ်ပဵၼ်ၶူးႁေႃးထမ်းၶရိယၼ်ႇသမ်ႉၵေႃႉၽုၵ်ႇ၊ မၼ်းဢမ်ႇၶႂ်ႈၽုၵ်ႇ ၵေႃႈၵႃႈလႆႈၽုၵ်ႇ၊ ၵွပ်ႈဝႃႈ ပီႇတုၸိတ်ႉ မႃးၵဵပ်းၶွၼ်ႇ 1 ႁိူၼ်း 5 သႅၼ်၊ ပေႃးဢမ်ႇၽုၵ်ႇယႃႈတေဢမ်ႇမီးငိုၼ်းပၼ်။ ဢၼ်ၽုၵ်ႇၵေႃႈ ဢမ်ႇၸႂ်ႈၽုၵ်ႇ တႃႇသင်၊ ၽုၵ်ႇတႃႇၸၢႆႇၶွၼ်ႇၵူၺ်း။ ၵူၼ်းၵဵပ်းၶွၼ်ႇမၼ်း ပဵၼ်ပီႇတုၸိတ်ႉ၊ ၵူၺ်းၵႃႈ ၶဝ်တင်းသိုၵ်းမၢၼ်ႈၽႄပၼ်ၵၼ် ၵိၼ်- ဝႃႈၼႆ။

ၵပ်းၵၢႆႇလွင်ႈၼႆႉ ၼႂ်းပၢင်ၵုမ်ၼၼ်ႉ တူဝ်တႅၼ်းၸၢဝ်းၶိူဝ်းၵယၢၼ်း (ပတွင်ႇ)ၵေႃႈ ၵမ်ႉထႅမ်ဝႃႈ မိူဝ်ႈပိူၼ်ႈ လိူၵ်ႈတင်ႈပီ 2010 ပူၼ်ႉမႃး၊ ၵျၼ်ႉၽုတ်ႉ ပႃႇတီႇသၢင်ႇသီႈၶဝ်သူၼ်းတုမ်ၵူၼ်းမိူင်းဝႃႈ-ပေႃးသူတွတ်ႈပၼ် ၶႅပ်းၵၢင်ၸႂ်ႁဝ်း၊ ႁဝ်းတေပၼ်သူၽုၵ်ႇယႃႈ။ ထိုင်မႃးၵမ်းၼႆႉ ၵေႃႈ ၶဝ်ၸႅၵ်ႇလိၵ်ႈတိၵ်းတိၵ်း၊ ၼႂ်းလိၵ်ႈ ပိုၼ်ၽၢဝ်ႇဝႃႈ ဢၼ်သၢၼ်ၶတ်းလွင်ႈၽုၵ်ႇယႃႈမဝ်းၵမ် ပဵၼ်ၸုမ်းပႃႇတီႇမိူင်းၵယၢၼ်းမႂ်ႇ KNLP ။ လွင်ႈၼႆႉ ပဵၼ်ၵၢၼ်သူၼ်းယူင်းႁႂ်ႈၵူၼ်းမိူင်းတင်း KNLP ႁၢင်ႇယၢၼ်ၵၼ်၊ ပေႃးဢမ်ႇပိုင်ႈဢိင်ၵူၼ်းမိူင်း KNLP ၶဝ် တေႁဵတ်းႁိုဝ်ယူႇလႆႈ၊ ၶဝ်လႆႈပိုင်ႈဢိင်ၵူၼ်းမိူင်းသေ သမ်ႉၵႂႃႇႁၢမ်ႈၵူၼ်းမိူင်းၼႆႉ ၶဝ်တေႁဵတ်းႁိုဝ်ႁၢမ်ႈလႆႈ- ဝႃႈၼႆ။ [KNLP (Kayan New Land Party)ၼႆႉ တူင်ႉၼိုင်ပွတ်းလႅၼ်ၶႅၼ်ႈ 4 မိူင်း (မိူင်းတႆး၊ မိူင်းမၢၼ်ႈ၊ မိူင်းယၢင်းၽိူၵ်ႇ၊ ယၢင်းလႅင်) ၊ ၵိုတ်းယိုဝ်းၵၼ်တင်း ၸုမ်းသိုၵ်းမၢၼ်ႈမႃး ၸဵမ်မိူဝ်ႈပီ 1994 တေႃႇထိုင်ယၢမ်းလဵဝ်၊ တင်ႈတႄႇၵိုတ်းယိုဝ်းမႃးထိုင်ယၢမ်းလဵဝ် တင်းတပ်ႉသိုၵ်းမၢၼ်ႈ ဢမ်ႇယိုဝ်းၵၼ်သေပွၵ်ႈ] -ၼႆယူႇ။

ငဝ်းလၢႆးဢၼ်ၼႆႉ ၼႂ်းမိူင်းတႆးပွတ်းၸၢၼ်း ပိုၼ်ႉတီႈၼႃႈလိၼ်ဢၼ်တပ်ႉသိုၵ်းၸိုင်ႈတႆး (RCSS/SSA)  လွႆတႆးလႅင်းတူင်ႉၼိုင်ၵေႃႈ ပဵၼ်ယူႇ။ ၸုမ်းပီႇတုၸိတ်ႉၶဝ်ပိုၼ်ၽၢဝ်ႇတိၵ်းတိၵ်းဝႃႈ  ဢၼ်သၢၼ်ၶတ်း ၵၢၼ်ၽုၵ်ႇၾိၼ်ႇ ဢမ်ႇၸႂ်ႈလူင်ပွင်ၸိုင်ႈ၊ ပဵၼ်ၸုမ်းလွႆတႆးလႅင်း။ လွင်ႈၼႆႉ ၶဝ်ၽႅၼ်ၵၢၼ်ၸႂ်ႉယႃႈၾိၼ်ႇသေ ႁဵတ်းႁႂ်ႈၵူၼ်းမိူင်းတႆးတင်း တပ်ႉသိုၵ်း SSA ႁၢင်ႇယၢၼ်ၵၼ်၊ ႁဵတ်းႁႂ်ႈၵူၼ်းမိူင်းမႃးၵမ်ႉထႅမ် ပီႇတုၸိတ်ႉ၊ ၵမ်ႉထႅမ်လူင်ပွင်ၸိုင်ႈ။ ပူၼ်ႉမႃးဢမ်ႇႁိုင်ၼႆႉ ယင်းမီးၵူၼ်းမိူင်းႁဵတ်းလိၵ်ႈထၢမ် ၸဝ်ႈယွတ်ႈသိုၵ်းဝႃႈ လွင်ႈၽဵဝ်ႈယႃႈမဝ်းၵမ်ၼႆႉ လူင်ပွင်ၸိုင်ႈယင်းဢမ်ႇမႆႈၸႂ်၊ ၸဝ်ႈႁဝ်းသမ်ႉမႆႈၸႂ်ႁဵတ်းသင် (မၢၵ်ႇၽိတ်ႉ ဢမ်ႇၽဵတ်း-ၵွပ်ႈသင်ၶိင်သမ်ႉၽဵတ်း)- ၼႆယူႇ။

ပူၼ်ႉမႃးမိူဝ်ႈဝၼ်းထိ 31/10/12 ၸုမ်းၾၢႆႇၽဵဝ်ႈမူၺ်ႉယႃႈမဝ်းၵမ်လႄႈ ရႃၸဝတ်ႈၸၢတ်ႈၸိုင်ႈၽွမ်ႉႁူမ်ႈ (UNODC) ဢွၵ်ႇၽိုၼ်ႁၢႆးငၢၼ်းဝႃႈ- တင်ႈတႄႇပီ 2007-2012 ၶၢဝ်းတၢင်း 6 ပီ ထပ်းၵၼ်မႃးၼႆႉ မိူင်းမၢၼ်ႈ ဢွၵ်ႇယႃႈၾိၼ်ႇတိူဝ်းမႃးလိူဝ်ၵဝ်ႇတိၵ်းတိၵ်း၊ ၼႂ်းပီ (2012)ၼႆႉ ပိုၼ်ႉတီႈၼႃႈလိၼ်ၽုၵ်ႇယႃႈ တိူဝ်းမႃး 17%၊ ယႃႈဢွၵ်ႇၵေႃႈတိူဝ်းမႃး 13%၊ ပီၵၢႆ 2011 ယႃႈဢွၵ်ႇ 610 တၼ်ႊ၊ ပီၼႆႉ 2012 ဢွၵ်ႇ 690 တၼ်ႊ။ မိူင်းလၢဝ်းၵေႃႈတိူဝ်းမႃးလိူဝ်ၵဝ်ႇ 66%။ ပီၼႆႉ ၼႃႈလိၼ်ၽုၵ်ႇယႃႈတီႈမိူင်းလၢဝ်း တၢင်းၵႂၢင်ႈမီး 6,800 ႁႅၵ်ႊတိူဝ်ႊ၊ မိူဝ်ႈပီၵၢႆ 4,100 ႁႅၵ်ႊတိူဝ်ႊ။ မိူင်းထႆးတႄႉလူတ်းယွမ်းၵႂႃႇ 4%၊ ပီၼႆႉမီး 209 ႁႅၵ်ႊတိူဝ်ႊ- ၼႆယဝ်ႉ။

ၵႃႈပူၼ်ႉမႃးၼႆႉ ဢိင်ၼိူဝ်လူင်ပွင်ၸိုင်ႈမၢၼ်ႈပိုၼ်ၽၢဝ်ႇလွင်ႈတီႇၽဵဝ်ႈယႃႉသူၼ်ယႃႈၼမ်မႃးသေ ၵႄႊရီႊ လူႊဝိတ်ႊ (Gary Lewis)တူဝ်တႅၼ်းၸုမ်း UNODC ၼႂ်းပွတ်းတွၼ်ႈဢေႊသျိူဝ်ႊဝၼ်းဢွၵ်ႇလႄႈ ပႄႊသိၾိၵ်ႊ၊ လၢတ်ႈဝႃႈ-  ဢၼ်ယႃႉသူၼ်ယႃႈၼမ်မႃးၼႆႉ မၼ်းဢမ်ႇၸႂ်ႈပၼ်ႁႃ၊ ဢၼ်ၽုၵ်ႇၼမ်မႃးၼႆႉယဝ်ႉ ပဵၼ်ပၼ်ႁႃ။ ပေႃးဝႃႈယင်းဢမ်ႇၸွႆႈပၼ်လႆႈတီႈၵူၼ်းၽုၵ်ႇသွမ်ႈမၼ်း (ၵူၼ်းႁဵတ်းသူၼ် ယႃႈ) မိူၼ်ၼင်ႇ ၸွႆႈပၼ်ႁႂ်ႈၶဝ်ပေႃးမီးၵၢၼ်ႁႃၵိၼ်လဵင်ႉတွင်ႉ ဢၼ်ပုတ်ႈတႅၼ်းပၼ်လႆႈ၊ ၼင်ႇႁိုဝ်ၶဝ်ပေႃးတေလႆႈၵိၼ်ၶဝ်ႈ လႄႈသၢႆႈတႅၼ်း လႆႈၼီႈၶဝ်ၼၼ်ႉ ၶဝ်ၵေႃႈတေၽုၵ်ႇယႃႈၵႂႃႇတိၵ်းတိၵ်းၵူၺ်း။ ပီၼႆႉ ၽုၵ်ႇယႃႈတိူဝ်းၼမ်မႃး 13% ၊ ပီၵၢႆ 610 ၊ ပီၼႆႉ 690 ။ ၵူၼ်းၽုၵ်ႇယႃႈ ၼႂ်းမိူင်းမၢၼ်ႈ မီးမွၵ်ႈ 300,000 မေႃႈၶဝ်ႈ၊ တိူဝ်းလိူဝ်မႃးပီၵၢႆ 17%၊ ပီၵၢႆမီး 256,000 မေႃႈၶဝ်ႈ၊ ဢၼ်ၽုၵ်ႇၼမ်သုတ်း ပဵၼ်မိူင်းတႆး 99% ၊ မိူင်းၶၢင် 10% ဝႃႈၼႆ။

ၵျေႊသၼ်ႊ ဢေႊလၢႆႊ ၽူႈတႅၼ်း UNODC တီႈမိူင်းမၢၼ်ႈ၊  ၵေႃႉဢၼ်မႃးၶဝ်ႈႁူမ်ႈပၢင်ဢုပ်ႇဢူဝ်း လွင်ႈယႃႈမဝ်းၵမ် တီႈတႃႈၶီႈလဵၵ်း (မိူဝ်ႈ 27-28/10/12 ဝူင်ႈၵၢင် 3 ၾၢႆႇ လူင်ပွင်ၸိုင်ႈမၢၼ်ႈ၊ ၸုမ်း UNODC ၊ RCSS) လၢတ်ႈဝႃႈ- ၸွမ်းၼင်ႇႁဝ်းလႆႈလူင်းပိုၼ်ႉတီႈသေၸွပ်ႇထတ်း (Survey) မႃးၼၼ်ႉ ၵူၼ်းဝၢၼ်ႈ ၽုၵ်ႇယႃႈ 37% ၊ ဢၼ်ၽုၵ်ႇၼမ်သုတ်း ပဵၼ်မိူင်းတႆးပွတ်းၸၢၼ်း မီးမွၵ်ႈ 48% ၊ မိူင်းတႆးပွတ်းဢွၵ်ႇ 43% ။ ၵဵဝ်ႇၵပ်းလွင်ႈၽုၵ်ႇယႃႈၼႆႉ ၵူၼ်းဝၢၼ်ႈ 79% လၢတ်ႈဝႃႈ- ၵွပ်ႈပိူဝ်ႈငိုၼ်းၶဝ်ႈၼမ်။ 45% လၢတ်ႈဝႃႈ ၵွပ်ႈတၵ်းလႆႈသိုဝ်ႉၶဝ်ႈသိုဝ်ႉတၢင်း ၵိၼ်။ 95% သမ်ႉလၢတ်ႈဝႃႈ ႁဝ်းဢမ်ႇလႆႈတၢင်းၸွႆႈထႅမ်တီႈလႂ်၊ လူင်ပွင် ၸိုင်ႈဢမ်ႇၸွႆႈပၼ်၊ ၶၼ်ယႃႈၵေႃႈၶိုၼ်ႈမႃးလိူဝ်ပီၵၢႆ 15% ၊ ပီၵၢႆၼိုင်ႈၵီႊလူဝ်ႊ 450 ၻေႃႊလိူဝ်ႊ၊ ပီၼႆႉ 520 ၻေႃႊလိူဝ်ႊ။

တၢင်းၸုမ်းၶၢဝ်ႇၽူႈတွႆႇႁွၵ်ႈ (SHAN) ယၢမ်ႈထတ်းသၢင်မႃးဝႃႈ 10 ပီပၢႆမႃးၼႆႉ ဢၼ်ၽုၵ်ႇၼႆႉ ဢမ်ႇၵွမ်ႉ မိူင်းၶၢင် မိူင်းတႆးၵူၺ်း၊ မိူင်းယၢင်း လႅင်၊ မိူင်းၶျၢင်း ၸိူဝ်းၼႆႉၵေႃႈၽုၵ်ႇၼမ်။ ဢၼ်ၽုၵ်ႇဢိတ်းဢွတ်း ပဵၼ်ၼႂ်းမိူင်းမၢၼ်ႈ တိူင်းမၼ်းတလေး၊ မၵူၺ်း၊ ၸႄႈၵႅင်ႇ(ၸၵၢႆး) ၸိူဝ်းၼႆႉ- ၼႆယူႇ။

ပူၼ်ႉမႃးဢမ်ႇႁိုင်ၼႆႉ ၽူႈတႅၼ်းၼႃႇၵၵေႃႈ တွင်ႈထၢမ်ၼႂ်းသၽႃးဝႃႈ ၸွင်ႇလူင်ပွင်ၸိုင်ႈမီးၽႅၼ်ၵၢၼ်ၽဵဝ်ႈယႃႈ ၼႂ်း 2 ၸႄႈဝဵင်းၼႃႇၵ- ၼႆယူႇ။ (လွင်ႈၼႆႉ ပွင်ႇဝႃႈ 2 ၸႄႈဝဵင်းၼႃႇၵၵေႃႈမီးၵၢၼ်ၽုၵ်ႇယႃႈ)။

ၵဵဝ်ႇၵပ်းလွင်ႈၽဵဝ်ႈယႃႈၼႆႉ ၸဝ်ႈၼႃႈတီႈၾၢႆႇၽဵဝ်ႈမူၺ်ႉယႃႈမဝ်းၵမ်မၢၼ်ႈ (CCDAC) ၵေႃႈယွမ်းႁပ်ႉဝႃႈ ပေႃးဝႃႈၾၢႆႇသိုၵ်းဢမ်ႇပႃးတႄႉ ႁဝ်းၽဵဝ်ႈယႃႈၼႆႉ ဢမ်ႇမီးတီႈပွင်ႇသင်။