Photo –  facebook
လုၵ်ႈဢွၼ်ႇ ဢၼ်လႆႈၶၢတ်ႇ လွင်ႈယူႇသဝ်း တႂ်ႈႁူမ်ႈငဝ်း မႅတ်ႉတႃႇ ပေႃႈမႄႈလႄႈ ပီႈၼွင်ႉ ၸိူဝ်ႉၶိူဝ်း ၸိူဝ်းၼၼ်ႉ ၶဝ်ၵိူတ်ႇပဵၼ်ၵူၼ်းမႃး ၶဝ်ဢမ်ႇတွၼ်ႉဝူၼ်ႉဝႃႈ ၵိူတ်ႇမႃး သုမ်းၸၢတ်ႈ သုမ်းပၢၼ်သေပွၵ်ႈ။

မၢင်ၵေႃႉၵေႃႈ တေပႆသဵၼ်ႈတၢင်းထုၵ်ႇ၊ မၢင်ၵေႃႉ တေပႆၺႃး သဵၼ်ႈတၢင်း ဢၼ်ၽိတ်းမၼ်း ၵူၺ်းၵႃႈ တၢင်းမုင်ႈမွင်း ၶဝ်ၵေႃႈ မီးယူႇ မိူၼ်ၵၼ်၊ မိူၼ်ၾၼ်ႁၢႆႉသေ ၸွမ်းလွၵ်ႇၶဝ်ယူႇ ၵူႈၶၢဝ်းယၢမ်း။

လႆႈလဵပ်ႈႁဵၼ်း ႁူႉမႃးတီႈ ပပ်ႉမၢႆတွင်း လုၵ်ႈဢွၼ်ႇၸၢႆး ၵေႃႉၼိုင်ႈ မၼ်းတႅမ်ႈဝႆႉဝႃႈ “ ၶႃႈယိၼ်းၸူမ်း ၶွပ်ႈၸႂ် ယႂ်ႇၼမ် ဢၼ်ႁဵတ်းႁႂ်ႈၶႃႈ လႆႈၵိူတ်ႇပဵၼ်ၵူၼ်းမႃး ၼိုင်ႈၸၢတ်ႈ၊ ယဝ်ႉၵေႃႈ ႁဵတ်းႁႂ်ႈၶႃႈ မေႃႁူႉ လွင်ႈတုၵ်ႉ၊ လွင်ႈသိူဝ်း၊ လွင်ႈၸဵပ်း၊ လွင်ႈတၢႆ၊ လွင်ႈလီ ဢမ်ႇလီ၊ ႁဵတ်းႁႂ်ႈ မေႃၸႅၵ်ႇၽႄ မီးလွင်ႈ ယိူၼ်ႉၵၼ်ႈၸႂ်လႆႈ ၸိူဝ်းၼႆႉ။

မၢင်ပွၵ်ႈ ပေႃးမီးလွင်ႈၸႂ်လဵၵ်ႉ တီႈဢၼ် ထုၵ်ႇပိူၼ်ႈ ႁဵတ်းႁၢႆႉ ထၢင်ႇလဵၵ်ႉ တဵၵ်းတဵင် ပေႉၵိၼ်ၸိူဝ်းၼၼ်ႉ ၶႃႈၼႆၵေႃႈ ၶၢမ်ႈပူၼ်ႉမၼ်းႁႂ်ႈလႆႈ၊ တီႈဢၼ်ၶႃႈ မုင်ႈမွင်းလိူဝ်သေပိူၼ်ႈ ပဵၼ်လွင်ႈတၢင်းပႅင်း၊ လွင်ႈႁႅင်းၸႂ်၊ လွင်ႈဢုၼ်ႇၸႂ်၊ လွင်ႈတူၺ်းထိုင်။

သမ်ႉဝႃႈ ဢမ်ႇမီးၽႂ် ပၼ်ၶႃႈလႆႈသေတႃႉ ၶႃႈၵေႃႈ ဢမ်ႇတုၵ်းယွၼ်းထိုင် တီႈၽႂ် ႁႂ်ႈပၼ်ၶႃႈၼင်ႇၵဝ်ႇ ဢမ်ႇဝၼ်းၼိုင်ႈၵေႃႈ ဝၼ်းၼိုင်ႈ ၶႃႈဝူၼ်ႉဝႃႈ တေမီးၵူၼ်းၼမ်ႉၸႂ်လီ သေၵေႃႉၵေႃႉ ယိုၼ်ႈမႅင်ႇပၼ် ၶႃႈယူႇ။

ယွၼ်ႉၶႃႈပဵၼ် ၸိူဝ်ႉလိူတ်ႈၶိူဝ်းသိူဝ် ပဵၼ်လုၵ်ႈမႄႈတႆးၵေႃႉၼိုင်ႈ ၸၢတ်ႈၼႆႉ သမ်ႉဝႃႈၶႃႈထုၵ်ႇ ပေႃႈမႄႈ ပွႆႇၽႃႈ သေတႃႉ ၶႃႈယုမ်ႇယမ်ဝႃႈ ၼင်လိၼ်မႄႈမိူင်းတႆးၼႆႉ တေဢမ်ႇပွႆႇၽႃႈၶႃႈ၊  ၶႃႈတေဢဝ်တူဝ်ၸႂ် ၼိူဝ်ႉလိူတ်ႈ ၽၢၵ်ႇဝႆႉတီႈ ၼိူဝ်ၽႅၼ်ႇလိၼ်ၸိူဝ်ႉၶိူဝ်း၊ ဝၢၼ်ႈမိူင်းတႆး။

ၼမ်ႉတႃၶႃႈ ဢၼ်လႆႈ လႆတူၵ်းယူႇ ၵူႈၶမ်ႈၶိုၼ်းၼႂ်ၼႆႉ တေဝႆႉပဵၼ် မေႃႇၼမ်ႉတိုင်းသႂ်၊ မိူဝ်ႈလဵဝ် ၶႃႈပဵၼ် ၵူၼ်းၵေႃႉလဵဝ် မီးၵမ်တႅမ်ႈလႄႈ ပပ်ႉဢွၼ်ႇၼိုင်ႈပပ်ႉ ႁဵတ်းပဵၼ် ဢူၺ်းၵေႃႉၶႃႈ သမ်ႉဝႃႈ ၶႃႈမီး ၼမ်ႉမိုၵ်ႉဢွၼ်ႇ ၼိုင်ႈယွတ်ႇ ၵူၺ်းၵေႃႈ ၶႃႈတေၶတ်းၸႂ် ဢၢၼ်းၶွတ်ႇတႅမ်ႈပဵၼ် ပိုၼ်းႁႂ်ႈလႆႈ” ဝႃႈၼႆ။

ပေႃးမီးၵူၼ်း ႁူႉတူဝ်ဝႃႈ ၶဝ်ပဵၼ်တႆးယူႇ ၶဝ်ၵေႃႈ တေမေႃတိုတ်ႉတၢႆး ယိုၼ်ႈမိုဝ်းႁပ်ႉတွၼ်ႈ ၼေႃႇတႅၼ်းၶိူဝ်း သႅၼ်းႁုၼ်ႈမႂ်ႇ၊ သိူဝ်ၼႆႉ တိုၼ်းဢမ်ႇပွႆႇၽႃႈလၢႆး ဢွၼ်ၵၼ်တိုတ်ႉတၢႆး လုၵ်ႈတွၼ်ႇၾႃႉ၊ လုၵ်ႈတိၼ်ႇၾႃႉ(လုၵ်ႈဢွၼ်ႇ ၽၢၼ်ပေႃႈမႄႈ) ဢၼ်တေ မႃးပဵၼ် သၢႆသိုပ်ႇ ၸိူဝ်ႉၶိူဝ်းတႆး တေမႃးပဵၼ် ၵေႃႉၸၢႆးငၢၼ် ႁၢပ်ႇထၢမ်းၵၢၼ် ဝၢၼ်ႈမိူင်း ဢဝ်ပုၼ်ႈၽွၼ်း ၼႃႈၵၢၼ် ၸိူဝ်ႉၶိူဝ်းၸဝ်ႈၵဝ်ႇ ႁႂ်ႈမီးတၢင်းႁိူဝ်ႈႁိူင်း ၶိုၼ်ႈယႂ်ႇၵႂႃႇ ဝၼ်းတႃႈ မိူဝ်းၼႃႈၼၼ်ႉ ၼႆယဝ်ႉ။

မိူၼ်ၼင်ႇ ထုင်းၵႂၢမ်းတႆးမီးဝႆႉ သိူဝ်တၢႆၵေႃႈ သိူဝ်တႅၼ်း၊ လႅၼ်းတၢႆၵေႃႈ လႅၼ်းပုတ်ႈ ပီႈၼွင်ႉၸိူဝ်ႉၶိူဝ်းတႆး တင်းသဵင်ႈ ယိပ်းၵမ်တႅမ်ႈသေ တႅမ်ႈဢွၵ်ႇၼႄ ႁႂ်ႈပဵၼ် ပိုၼ်းတႆး ႁၢင်ႈလီ ၵိုၵ်းဝႆႉ ၵူႈပိုၼ်ႉတီႈ ၼိူဝ်ၽႅၼ်ႇလိၼ် မႄႈမိူင်း တႆးတႃႉ။