ပွႆးၽြႃးၵၢင်ဝဵင်းၼမ်ႉၶမ်း၊ ဢမ်ႇၼၼ် ပွႆးသၢဝ်းသၢမ် (23) ၼႆႉ ၸတ်းႁဵတ်းမႃးၵူႈပီ၊ ပေႃးထိုင်လိူၼ် 11 လွင်ႈ 8 ၶမ်ႈ ႁဵတ်း 3 ဝၼ်း 3 ၶိုၼ်းထပ်းၵၼ်မႃး။ ပီ 2012 ၼႆႉၵေႃႈ ၸတ်းတင်ႈတႄႇဝၼ်းထိ 5-7/11/12 ။ ယၢမ်းၵၢင်ၶမ်ႈ မီးၸၢတ်ႈသႅင်းတႆး၊ ပၢင်ႁွင်ႉၽဵင်းၵႂၢမ်းတႆးမႂ်ႇ (Stage Show) လဝ်ႇမူၼ်ႈတူၼ်ႈၸႂ်။ ဝၼ်းထိ 7/11/12 ဢဝ်တူၼ်ႈၶူဝ်းတၢၼ်း ႁႄႇလဵပ်ႈဝဵင်းသေ ယိုၼ်ႈယေႃးတၢၼ်း တမ်ႈတီႈဝတ်ႉ/ၵျွင်းမုၼ်ၸဝ်ႈ။

ၵၢင်ၼႂ်ၸဝ်ႉဝၼ်းပွႆးဝၼ်းလိုၼ်းသုတ်းၼၼ်ႉ ၼိမၼ်တသင်ၶၸဝ်ႈ 350 တူၼ်သေ တၢင်ႇဢၼေႇၵၸႃႇၽြႃးပဵၼ်ၸဝ်ႈ ၵၢင်ဝဵင်း၊ ပေႃးယဝ်ႉၵေႃႈ လဵင်ႉၿဵၼ်း (ၵၢပ်ႈသွမ်း) သင်ၶၸဝ်ႈ။ ၽွင်းၵၢင်ၼႂ် ၶႃႈႁၢပ်ႇၵၢၼ်ၶုၼ် ၸိူဝ်းမီးတီႈဝဵင်းၼမ်ႉၶမ်းလႄႈ ၵူၼ်းဝၢၼ်ႈၵူၼ်းမိူင်း ၼပ်ႉႁူဝ်ပၢၵ်ႇဢွၼ်ၵၼ်မႃးသႂ်ႇၿၢတ်ႇ(လွင်းသွမ်း)-  လုင်းၸၢႆးထုၼ်း ၵေႃႉၵႂႃႇလွင်းၶဝ်ႈသွမ်းလၢတ်ႈ ၼႄၼင်ႇၼႆ။

သိုပ်ႇလၢတ်ႈဝႃႈ- ၼႂ်းဝၼ်းထိ 6 တီႈဝဵင်းၼမ်ႉၶမ်းၼႆႉ ယွၼ်ႉၾူၼ်တူၵ်းႁႅင်းလႄႈပွႆးဢမ်ႇပေႃးၵိုၼ်း၊ ထိုင်မႃး ဝၼ်းထိ 7 ၾူၼ်ႁိူတ်ႇၵႂႃႇလႄႈ ၽွင်းဢဝ်တူၼ်ႈၶူဝ်းတၢၼ်းလဵပ်ႈဝၢၼ်ႈ လဵပ်ႈဝဵင်းၼၼ်ႉ ၵူၼ်းၵိုၼ်းတႄႉတႄႉ။ ဢၼ်လၢၵ်ႇလၢႆးၼၼ်ႉ မီးႁုၼ်ႇႁၢင်ႈၼူၵ်ႉၵိၼ်ႇၵရႃႇ/ တူဝ်း/ ၸၢင်ႉ ဢၼ်ႁၢင်ႈၶိူင်ႈၶိုၵ်ႉၶႅမ်ႉၸိူဝ်းၼႆႉ ႁဵတ်းပဵၼ် ၶိူင်ႈၶူဝ်းတၢၼ်းပိူင်ၼိုင်ႈ၊ ဢဝ်လဵပ်ႈ ဝဵင်းယဝ်ႉၶိုၼ်ႈဝတ်ႉလူႇတၢၼ်း- ဝႃႈၼႆ။

ၵဵဝ်ႇၵပ်းလွင်ႈၼႆႉ ၸၢႆးၶမ်း ၵူၼ်းၼုမ်ႇၼမ်ႉၶမ်းလၢတ်ႈဝႃႈ- ပွႆးသၢဝ်းသၢမ် (23)ၼႆႉ တႄႇၼပ်ႉလိူၼ် 11 မႂ်ႇ 1 ၶမ်ႈ တေႃႇထိုင်လိူၼ် 11 လွင်ႈ 8 ၶမ်ႈ၊ မီး 23 ဝၼ်း လႄႈႁွင်ႉဝႃႈပွႆး 23 ။ ပီၼႆႉ ၽွင်းလဵပ်ႈတူၼ်ႈ ၶူဝ်းတၢၼ်းၼၼ်ႉ ၵူၼ်းၵိုၼ်း ဢမ်ႇယွမ်း မွၵ်ႈ 6,000 ၊ ပဵၼ်ပွႆးဢၼ်ၵိုၵ်းပိုၼ်းမႃးလႄႈ ၵူၼ်းၶဝ်ႈႁူမ်ႈ တင်းၼမ်တင်းလၢႆ။ လႆႈႁၼ်ၵူၼ်းပွၵ်ႉၼိုင်ႈလႄႈ ပွၵ်ႉၼိုင်ႈ ၼုင်ႈသိူဝ်ႈၶူဝ်းတႆးသီမိူၼ်ၵၼ် လဵပ်ႈတူၼ်ႈ ၶူဝ်းတၢၼ်း 49 တူၼ်ႈ၊ ၵွင်မွင်းသိူင်း 49 သိူင်း၊ တီႈဝဵင်းၼမ်ႉၶမ်း 1 ပွၵ်ႉ ႁဵတ်း တူၼ်ႈၶူဝ်းတၢၼ်း 1 တူၼ်ႈ၊ မႃးႁူမ်ႈၵၼ်ႁႄႇႁွပ်ႈဝဵင်း၊ ႁူႉပုၼ်ႈၽွၼ်းၽႂ်မၼ်းၽဵင်ႇပဵင်းၵၼ် လူၺ်ႈဢမ်ႇလႆႈ မၵ်းၶၢၼ်းသင် ၸိူဝ်းၼႆႉ ၼႂ်းထႃၼပဵၼ်ၵူၼ်းဝဵင်းၼမ်ႉၶမ်းၵေႃႉၼိုင်ႈသေ ၼႂ်းၸႂ်ၼႂ်းၶေႃး ယိၼ်းလီၸူမ်းၸႂ်တႄႉတႄႉ – ဝႃႈၼႆ။

ပၢင်ပွႆး 23 ဝဵင်းၼမ်ႉၶမ်းၼႆႉ တႄႇႁဵတ်းမႃးႁူဝ်ပၢၵ်ႇပီ ၸဵမ်မိူဝ်ႈပၢၼ်ၸဝ်ႈၾႃႉ၊ တေႃႇထိုင်ယၢမ်းလဵဝ်ၵေႃႈ ယင်းတိုၵ်ႉၵိုၼ်း မိူၼ်ၵဝ်ႇ၊ ပေႃးဢမ်ႇမီးၵၢၼ်သိုၵ်းသိူဝ်ၼႂ်းဝၢၼ်ႈၼႂ်းဝဵင်း ၸတ်းႁဵတ်းၵူႈပီ- ၼႆယဝ်ႉ။