ၵေႃႉထုၵ်ႇတိၺွပ်းဝႆႉဢၢႆႈယူင်ႇဢႃႇယူႉ(22) လႄႈတင်းယႃႈမႃႉဢၼ်တိၺွပ်းလႆႈပႃးဝႆႉၼၼ်ႉ

မိူဝ်ႈဝၼ်းထီႉ 9-11-2012 တပ်ႉသိုၵ်းမၢၼ်ႈ ဢဝ်ၶိူင်ႈလူင်ၶဝ်ႈယိုဝ်း ႁူပ်ႈသိမ်းဢဝ် တပ်ႉလွႆ(တဢၢင်း) TNLA ဢၼ်ပၵ်းသဝ်းယူႇဝႆႉၼိူင်ၵုင်း ထပ်ႉၶျၢပ်ႉ ႁိမ်းလႅၼ်လိၼ် ဝဵင်းမိူင်းဝီး လႄႈ ဝဵင်းၼမ်ႉၶမ်း ၸပ်းၵၼ်ၼႆ ၵူၼ်းၵႃႉၵေႃႉဢၼ် ၵႂႃႇပႆသဵၼ်ႈတၢင်းၼၼ်ႉ လၢတ်ႈၼႄၼင်ႇၼႆ။

“ပဵၼ်ၵႂႃႇၸိူဝ်း ထပ်ႉၶျၢပ်ႉ လႄႈ မူင်းဝႃးၼၼ်ႉယဝ်ႉ၊ တပ်ႉမၢၼ်ႈ ၶဝ်ႈတိုၵ်း တပ်ႉတဢၢင်းၶဝ် ပၵ်းသဝ်းယူႇၼၼ်ႉယဝ်ႉ၊ တႄႇၵၢင်ၼႂ် 9 မူင်းသေ ၵမ်ႉၼိုင်ႈၵိုတ်း ၵမ်ႉၼိုင်ႈယိုဝ်း တေႃႇပေႃးထိုင် 2 မူင်း သဵင်ၸင်ႇယဵၼ်ၵႂႃႇ၊ ငိၼ်းတႄႉ တပ်ႉမၢၼ်ႈဢဝ်ၶိူင်ႈလူင် ပိုတ်းယိုဝ်းသႂ်ႇလႄႈ တပ်ႉတဢၢင်း လႆႈထွႆပၼ်ၼႆဢေႃႈ၊ ယၢမ်းလဵဝ်တႄႉ တပ်ႉမၢၼ်ႈပုတ်ႈပၵ်းသဝ်းဝႆႉဢေႃႈ၊ ၸူဝ်ႈၶၢဝ်းၼႆႉ ၵူၼ်းၵႂႃႇၵူၼ်းပႆတႄႉ လႆႈၵိုတ်းဝႆႉယူႇဢေႃႈ” လၢတ်ႈဝႃႈၼႆ။

တပ်ႉသိုၵ်းမၢၼ်ႈ ၶလယ 130၊ 144၊ ၶမယ 501 ႁူမ်ႈႁွမ်းၵၼ်သေ တိုၵ်းသိမ်းဢဝ်တပ်ႉ တီႈၵုင်းၼၼ်ႉ၊ ယၢမ်းလဵဝ် တပ်ႉ ၶလယ 130 ပၵ်းသဝ်းယူႇၼႆ လႆႈႁူႉၸွမ်းၼင်ႇၼႆ။

မိူဝ်ႈဝၼ်းထီႉ 5 လိူၼ် November ပႆႇပဵၼ်ပၢင်တိုၵ်းၵၼ်ၼၼ်ႉ တပ်ႉသိုၵ်းလွႆ (တဢၢင်း) TNLA တီႉၺွပ်းလႆႈ ၵူၼ်းၸၢဝ်းၶႄႇ ၸိုဝ်ႈႁွင်ႉၸၢႆးယူင်ႇ ပႃးတင်း ယႃႈမႃႉ 5 မိုၼ်ႇလုၵ်ႈ ၵႃႈၶၼ်မီးမွၵ်ႈ 500 သႅၼ်ပျႃး၊ ၵွပ်ႈၼႆႉလႄႈ သိုၵ်းမၢၼ်ႈၶဝ်ႈတိုၵ်း တပ်ႉသိုၵ်းလွႆ (တဢၢင်း) ၼႆၸုမ်းဢွၼ်ႁူဝ်ၵၢၼ်မိူင်း တပ်ႉTNLA  ၽူႈၼမ်းၼႂ်း PSLF ၸၢႆးဢၢႆႈၽူင်း လၢတ်ႈၼႄၼင်ႇၼႆ။

“ၵွပ်ႈသင်လႄႈၼႆ မိူဝ်ႈဝၼ်းထီႉ 5 ၼၼ်ႉႁဝ်းၶႃႈတီႉၺွပ်းဝႆႉ၊ ဝၼ်းထီႉ 7 သမ်ႉ သၢႆသိုၵ်း 114 လႄႈ 501 ၶဝ်မႃးတီႈဝၢၼ်ႈ ၼေႃႇယယွၵ်ႉ ဢၼ်ယၢၼ်ၵႆၵၼ် တင်းႁဝ်းမွၵ်ႈ 2လၵ်း၊ တႄႇဝၼ်းၼၼ်ႉယဝ်ႉ တပ်ႉသိုၵ်းမၢၼ်ႈၶဝ် ၵပ်းသိုပ်ႇတပ်ႉၵွင်ႁဝ်းမႃးဝႃႈ ၶႂ်ႈၶိုၼ်ႈမႃး ၶႂ်ႈထူပ်းၵၼ် ယဝ်ႉၵေႃႈလႆႈႁူႉဝႃႈ ပႃးၶႄႇၶဝ်သေၼႆဢေႃႈ၊ ဝၢႆးသေၽူႈၵွၼ်းတပ်ႉႁဝ်းၶိုၼ်းတွပ်ႇဝႃႈ ဢမ်ႇထူပ်းလႆႈၼႆၵေႃႈ မိူဝ်ႈဝၼ်းထီႉ 7 ၼၼ်ႉၽၢႆႇၶဝ်ဢဝ်ၶိူင်ႈလူင်ယိုဝ်းမႃးၵမ်းၼိုင်ႈ၊ မိူဝ်ႈဝႃး ဝၼ်းထီႉ 9 ၼႆႉၶဝ်ပႃးတပ်ႉၵွင် ၶလယ 130 ႁႅင်းသိုၵ်းမွၵ်ႈ 100 ပၢႆသေၶိုၼ်ႈတိုၵ်းမႃးႁဝ်းၶႃႈၼၼ်ႉ တေပဵၼ်ယွၼ်ႉဢၼ်ႁဝ်းတီႉၺွပ်း လုၵ်ႈဢွၼ်ႇၶႄႇၼႆႉၵူၺ်း၊ မၼ်းပဵၼ်ယႃႈမႃႉ ဢၼ်မႃးတင်း ၼႃႈလိၼ် ပၢၼ်းသေးၵျေႃႇမိၼ်ႉ၊ လုၵ်ႈဢွၼ်ဢၼ်ႁဝ်းၶႃႈၺွပ်းဝႆႉ ဢၢႆႈယူင်ႇ ၼၼ်ႉၵေႃႈ လၢတ်ႈဢွၵ်ႇဝႆႉဝႃႈၼႆယဝ်ႉ”။

ယႃႈၸိူဝ်းဢၼ် တပ်ႉသိုၵ်းလွႆ (တဢၢင်း) TNLA ၽႅၼ်ဝႆႉဝႃႈ ဢၼ်လႆႈတီႉၺွပ်ႉဝႆႉၼၼ်ႉ  ဢမ်ႇႁိုင်သင် တေၸုတ်ႇၽဝ် ၽၢႆႇၼႃႈၵူၼ်းဝၢၼ်ႈ ၵူၼ်းသူၼ်ၶဝ်ယဝ်ႉၼႆ လႆႈႁူႉၸွမ်းၼင်ႇၼႆ။